ווייטער'דיגע אנטוויקלונג פון הרחבת גבולי הקדושה דקהלתינו הק' מאנסי
אין די לעצטערע וואכן און חדשים זענען די הנהלת קרן הבנין אריין אין א נייע פאזע, און געארבעט מיט איבערמידליכע כוחות צו קענען אויפשטעלן א פרעכטיגע צייטווייליגע ביהמ"ד מיט אלע צוגעהערן ווי עס פאסט זיך פאר א בית מקדש מעט, אויף א געשמאקע רחבות'דיגע פארנעם, ברוחניות ובגשמיות.
אין די יעצטיגע טעג ליידיגט מען אויס די גאנצע בנין הביהמ"ד און עזרת נשים, פון כמעט אלע ספרים און חפצים. די וואך שב"ק וועט פארקומען די לעצטע תפילות אין בית מדרשינו הישן, אינאיינעם מיט א שמחת ברית מילה ביי הר"ר יעקב שמעון ראבינאוויטש שליט"א מגי"ש בבית מדרשינו, וואס וועט בעז"ה געפראוועט ווערן שב"ק אינדערפרי נאכן דאווענען בהיכל הביהמ"ד.
מוצש"ק וועט מען אוועקטראגן אלע איבריגע חפצים און פריוואטע ספרים, און די סידורים און חומשים וספרי עבו"ע וואס מ'האט גענוצט שבת קודש. ומכאן הקריאה יוצאת צו אלע אנשי שלומינו וועלכע האבן נאך דארט איבערגעלאזט פריוואטע ספרים אדער חפצים, אז מען זאל דאס אוועקנעמען ביז שפעטסטנס מוצש"ק.
קומענדיגן זונטאג כי תבוא וועט מען בעז"ה אפהאקן די לעקטער און וואסער, און מאנטאג כי תבוא וועט מען אראפווארפן דעם בנין ביהמ"ד הישן.
אין די צייט פון די אנגייענדע ארבעט להרחבת גבולי הביהמ"ד מיטן אויפשטעלן די הערליכע צייטווייליגן בנין פון טרעילער'ס, וועלן די תפילות ושיעורים ווייטער אנגיין אינעם געדונגענעם לאקאל בבנין ביהמ"ד פרעמישלאן אויף העריק קארנער סטעפאנס, כדי שלא יבוטל התמיד.
די סדר וועט זיין ווי פאלגנד: די וואך שבת קודש וועט מען דאווענען געהעריג אינעם אלטן ביהמ"ד. במשך פרשת כי תבוא און נצבים-סליחות וועלן די תפילות און קביעות עיתים לתורה, און די שיעור פון הרה"ג די דיין שליט"א פארקומען אין א באזונדערן היכל מיוחד בבנין ביהמ"ד פרעמישלאן. - אויף שבת קודש פרשת נצבים - שבת ערב ר"ה וועט מען בעזרת השם יתברך צוריק דאווענען אינאיינעם און באנייען דעם הערליכן פארגרעסערטן צייטווייליגן היכל הבית המדרש, בשטח בית המדרש הישן, לקראת די נייע יאר הבעל"ט, בשעת מ'וועט בעז"ה ארבעטן אויפן נייעם בנין החדש בתפארתו.
די הנהלת קרן הבנין לייגן אין די זעלבע צייט אריין ספעציעלע כוחות זיך צו רוקן שנעל פאראויס אויף די פלענער פונעם בנין החדש והמפואר. דעם דאנערשטאג האט מען געלייגט די ספעציעלע געיט ארום די שטח הבנוי', און דעם קומענדיגן דינסטאג נאך די בנין הישן וועט זיין אינגאנצן אראפ, וועט אסאך גרינגער ערמעגליכט ווערן די ענדגילטיגע נויטיגע עפראוועל'ס צו קענען אנהייבן מיט די פאקטישע גראב ארבעט אויף די יסודי הבנין.
בורא עולם בקנין השלם זה הבנין!
בילדער
מען שנייד אפ די ביימער ארום די שטח |
