תלמידי שיעור ג' האלטן מיט א ספעציעלע מסיבת מלוה דמלכה אויף א פריוואטע פארנעם בביתו נאוה קודש
די פארלאפענעם מוצאי שב''ק תולדות זענען די תלמידי שיעור ג' געלאדענט געווארן צו א ספעציעלע מסיבת מלוה דמלכה, בביתו נאוה קודש פון כ''ק מרן רבינו שליט''א, לרגל די יום הצלה ג' כסליו, בעת ווען 6 יאר צוריק איז מרן רבינו שליט''א געווען פארמישט אין א שווערע עקסידענט. ביי די מלוה מלכה זענען אויך פאררופן געווארן די משפחת המלוכה בני וחתני כ''ק מרן רבינו שליט"א, און אזוי אויך די משמשים בקודש משתתפי הנס.
די ערשטע חלק מלוה דמלכה האט מרן רבינו שליט''א מייחד געווען ספעציעל פאר די געטרייע תלמידים, וואס דאן האט דער רבי פארברענגט מיט די תלמידים אויף זייער א פריוואטע פארנעם, פארציילנדיג סיפורי צדיקים וזכרונות ימי קדם, און די בחורים האבן פארציילט סיפורים פארן רבי'ן, און עס האט זיך פארפירט א פאטערליכע שמועס, פון וואס די תלמידים האבן דערפון ארויסגענומען הויפענעס חיזוק און יראת שמים, און אנגעקניפט א אייביגע שטארקע קשר מיט רבם ומוארם.
שפעטער בעת די מלוה מלכה האט אויפגעטרעטן הרה"ג ר' אברהם שלמה פאפלאנאש שליט"א, ובנו הרה"ח ר' יואל אלחנן הי"ו משב"ק וממשתתפי הנס, וועלכע האבן ביידע אייניג ארויסגעברענגט די חיוב הודאה וואס פארלאנגט זיך בעת ווען א מענטש גייט דורך א נס, ובפרט ווען עס רעדט זיך פון א געטרייע מנהיג איז יעדער מחויב צו אפגעבן א שבח והודאה להשי"ת, ובפרט די תלמידים הקרויים בנים.
אויך האט אויפגעטרעטן די חשוב'ע מגי"ש הרה"צ רבי נחמן כהנא שליט"א, חדב"ן, וועלכע האט איבערגעגעבן א גריס פאר'ן רבי'ן, ווי די בחורים זענען זיך ממית באהלו של תורה מיט א אמת'ע יגיעה עצומה, לערנענדיג די שווערע טיפזינגע הלכות אין הל' טריפה, און נעמען צוזאם די לימודים אויף א אופן עס זאל בלייבן איינגעקריצט פאר לאנגע יארן.
נאך ברהמ"ז האט מען זיך אינאיינעם אויפגעשטעלט טאנצן חסדי השם כי לא תמנו, צו לויבן און דאנקען דעם אייבערשטן אויף אלע ניסים און חסדים, און די בחורים האבן זיך צוריקגעקערט אין ישיבה מיט געהויבענע געפילן און חיזוק אנצוגיין ווייטער. |
